გაყიდვების 5 პრინციპს შორის, მეორე პრინციპი - გაყიდვები არის პროაქტიული და არა რეაქტიული პროცესი.

პირველ რიგში, განმარტება უნდა გავაკეთოთ, რომ რეაქტიული პროცესი არის ნებისმიერი მოქმედება, რომელიც ხდება რაღაცის პასუხად,  ანუ თუ მაღაზიაში შემოვიდა კლიენტი, დაგვირეკა თუ მეილი მოგვწერა ჩვენ რეაქტიულ რეჟიმში ვართ. ჩვენ ვამბობთ, რომ, როდესაც კლიენტი თავისი ფეხით გვაკითხავს, უნდა პროდუქტის შეძენა და გვეკითხება დეტალებს, ეს არის მომსახურების პროცესი და არა გაყიდვების. გაყიდვები კი ჰქვია პროაქტიულ პროცესს, როდესაც კლიენტს არ წამოუწყია ჩვენთან ურთიერთობა და ჩვენ ვცდილობთ მასთან კომუნიკაციის დამყარებას.

რა თქმა უნდა, რეაქტიული გაყიდვა არსებობს, მაგრამ ამას ჩვენ მომსახურებას ვუწოდებთ. ცალსახად, ეს პროცესი მნიშვნელოვანია, ნებისმიერ ბიზნესს უნდა შეეძლოს, რომ მასთან მისული კლიენტი დააკვალიანოს და შესაბამისი ინფორმაცია მიაწოდოს.

მაგრამ, თუ გინდათ, რომ ბიზნესი განვითარდეს და მომგებიანი იყოს აუცილებელი პირობაა პროაქტიული გაყიდვების წარმოება, რაც ნიშნავს, რომ ჩვენ უნდა მივაკითხოთ კლიენტს.

პროაქტიული გაყიდვების დროს ჩვენ ვაშენებთ ჩვენსა და კლიენტს შორის ხიდს, რომელსაც შეგვიძლია ურთიერთობების ხიდი ვუწოდოთ, რომელზეც პროდუქტებით დატვირთულმა სატვირთომ უნდა იაროს.

ალბათ გქონიათ შემთხვევა, როდესაც შეხვედით მაღაზიაში პროდუქტის საყიდლად და გამყიდველმა გირჩიათ, რომ არ შეგეძინათ ხორცი ან ბოსტნეული, რადგან ის უკვე დაძველებული იყო. იმ მომენტში გამყიდველმა კომპანიას შესაძლოა შემოსავალი დააკლო, მაგრამ გაამყარა თქვენთან ნდობაზე დაფუძნებული ურთიერთობა და შანსი, იმის, რომ ამ მაღაზიას კიდევ ესტუმროთ და როცა ახალი პროდუქტი ექნებათ შეიძინოთ დიდია.

სწორედ, რომ პროაქტიული გაყიდვები აშენებს ხიდებს. კლიენტთან კომუნიკაციისას ზოგჯერ გაყიდით პროდუქტს ზოგჯერ ვერ გაყიდით. ამასთან დაკავშირებით მნიშვნელოვანია სწორად გქონდეთ შეხედულება ჩამოყალიბებული. გაყიდვების შედეგი მარტო გაყიდვა არ არის. მცდარია მოსაზრება, რომ თუ გაყიდეთ მხოლოდ მაშინ მიიღეთ შედეგი. რეალურად არსებობს ორი შედეგი - გაყიდვა, ანუ შემოსავლის გაზრდა და ურთიერთობის განვითარება. შეიძლება დღეს პროდუქტი ვერ გაყიდოთ, მაგრამ აუცილებლად უნდა იზრუნოთ გრძელვადიანი ურთიერთობის მშენებლობაზე.

თქვენ შეიძლება ისეთი პროდუქტი მიყიდოთ ადამიანს, რომელიც არ სჭირდება და დამატებით 100 ლარი გამოიმუშავეთ, მაგრამ მომავლის პერსპექტივაში ასეთი მიდგომით დაკარგოთ 10 000 ლარის შემოსავალი და პირიქით, თუ თქვენ დღეს ურთიერთობის გამყარებაზე იმუშავებთ, მომავალში ეს კომპანიას გაცილებით მეტ შემოსავალს მოუტანს.

გარკვეულწილად, პროაქტიული გაყიდვები არის უბურთოდ თამაში. ეს არ არის მხოლოდ პროდუქტის გაყიდვა, ეს არის ურთიერთობაზე ორიენტირებული პროცესი, რომელიც საბოლოო ჯამში აუცილებლად მიგვიყვანს გაყიდვებამდე.